喺卡塔爾舉行嘅2022世界盃，喺香港時間前晚（即11月20日）正式開鑼。尋晚就踢左分組賽B組英格蘭對伊朗，但英國支旗唔係見慣見熟嗰支藍底米字旗，而喺11月30日更有場係英格蘭對威爾斯，乜唔係全部都係英國嚟架咩？搞到好多無睇開波嘅人都話：「媽！我好亂！」
「英國」簡史
其實呢，「英國」依個簡稱唔太準確。英國全名係「大不列顛及北愛爾蘭聯合王國」，英文簡稱係The United Kingdom (UK)或者Great Britain (GB)。英國個「英」字，來自大不列顛當中一個主要地區「英格蘭」（England）嘅略稱，而大不列顛仲有其他三個地區，分別係蘇格蘭（Scotland）、威爾斯（Wales）同北愛爾蘭（Northern Ireland）。英格蘭主體民族係有日耳曼血統嘅盎格魯—撒克遜人（Anglo-Saxon），而蘇格蘭、威爾斯同北愛爾蘭／愛爾蘭人就係主要來自不列顛島原居民凱爾特人（Celtic）。
叫得「聯合王國」，咁個國家就梗係組合而成架啦。歷史嘢唔講太多，簡單黎講就係1603年英格蘭王位出缺，結果時任蘇格蘭國王詹姆士六世（King James VI），繼承埋英格蘭國王成為英王詹姆士一世（King James I），從此，蘇格蘭就同世仇英格蘭組成了「聯合王國」。當依個只係一超簡略版本，當中仲有好多細節位嘅，不過依度唔講太多住嘞。
國旗設計
講返國旗先，其實大不列顛所有地區都有自己的旗幟或者旗幟設計象徵：
| 地區 | 設計 | 圖象 |
| 英格蘭 | 聖喬治十字旗，設計來自英格蘭守護聖者聖喬治 (St. George) 嘅徽號。 |  |
| 蘇格蘭 | 聖安德烈十字旗，設計來自蘇格蘭守護聖者聖安德烈 (St. Andrew) 嘅徽號。 |  |
| 北愛爾蘭 | 聖博德十字，設計來自愛爾蘭守護聖者聖博德 (St. Patrick) 嘅徽號。（北愛爾蘭現時並無官方旗幟，而愛爾蘭係獨立後採用咗綠白橙三色旗） |  |
| 威爾斯 | 威爾斯紅龍 |  |
而藍底米字旗（又叫聯合杰克旗 (The Union Jack)），其實係上面頭三支旗重疊組合而成；而威爾斯國旗係喺1959年才為威爾斯議會採納，因此藍底米字旗並無包含威爾斯國旗的元素。
點解有兩隊「國家隊」？
足球起源於英國，世界第一個「國際」足球組織，其實係由英格蘭、蘇格蘭、愛爾蘭同威爾士所組成。因此，喺足球賽事上，英格蘭、蘇格蘭、威爾士雖然係「聯合王國」嘅一部份，但都有自己嘅「國家隊」。而英格蘭、蘇格蘭、威爾斯都有自己嘅超級聯賽。
